Kauli hiyo ilitolewa Jumanne mjini Tehran kupitia ujumbe maalum uliotumwa kwa mahujaji wa Hijja, ambapo kiongozi huyo alieleza msimamo mkali wa Iran dhidi ya Israel pamoja na ushawishi wa Marekani katika Mashariki ya Kati.
Kwa mujibu wa vyombo vya habari vya Iran, ujumbe huo ulijumuisha kumbukumbu ya kauli iliyowahi kutolewa miaka kadhaa iliyopita na aliyekuwa Kiongozi Mkuu wa Iran, Ali Khamenei, aliyesema kuwa Israel isingeonekana tena katika kipindi cha miaka 25 ijayo.
Katika hotuba hiyo, Mojtaba Khamenei aliitaja Israel kama utawala wa Kizayuni usio imara huku akidai kuwa taifa hilo linaelekea katika hatua za mwisho za uwepo wake kutokana na migogoro ya kisiasa, kijeshi na kijamii inayoendelea katika eneo hilo.
Aidha, kiongozi huyo alitabiri kupungua kwa nguvu na ushawishi wa Marekani katika Mashariki ya Kati, akisema kuwa mataifa ya eneo hilo hayatakuwa tena maeneo salama kwa uwepo wa vituo vya kijeshi vya Marekani.
“Nchi na ardhi zote za eneo hili hazitakuwa tena ngao ya kulinda vituo vya kijeshi vya Marekani. Marekani haitakuwa tena na maeneo salama ya kuendeleza mashambulizi yake na kuanzisha vituo vingine vya kijeshi katika eneo hili,” sehemu ya ujumbe huo ilieleza.
Kauli hizo zimekuja wakati mvutano kati ya Iran, Israel na Marekani ukiendelea kuongezeka huku hofu ya kuongezeka kwa migogoro ya kijeshi na kisiasa katika Mashariki ya Kati ikiendelea kutanda.
Wachambuzi wa siasa za kimataifa wanaeleza kuwa matamshi hayo yanaweza kuongeza mvutano wa kidiplomasia katika eneo hilo, hasa kutokana na historia ya uhasama kati ya Iran na Israel inayohusisha masuala ya usalama, mpango wa nyuklia pamoja na ushawishi wa kisiasa katika mataifa ya Kiarabu.
Kwa upande mwingine, baadhi ya wataalamu wanaamini kuwa kauli hizo ni sehemu ya vita vya maneno vinavyoendelea kati ya Tehran na Tel Aviv huku kila upande ukijaribu kuonyesha nguvu zake kwa washirika na wapinzani wake.
Tangu Mojtaba Khamenei ateuliwe kuwa Kiongozi Mkuu wa Jamhuri ya Kiislamu ya Iran, hakujawahi kutolewa rasmi picha au sauti yake hadharani jambo ambalo limeendelea kuzua maswali kutoka kwa jumuiya ya kimataifa kuhusu namna anavyoendesha uongozi wake na kuwasiliana na wananchi.
Matamshi yake ya hivi karibuni yanatarajiwa kuibua mjadala mpana zaidi duniani huku mataifa mbalimbali yakifuatilia kwa karibu athari zinazoweza kujitokeza kwa usalama wa kimataifa pamoja na mahusiano ya kidiplomasia katika eneo nyeti la Mashariki ya Kati.
Post a Comment