Hamu ilirudi kwa kasi ya ajabu na mwili wangu ukawa vizuri

Mashambulizi yaliyodaiwa kufanywa na Iran dhidi ya kambi mbili za kijeshi za Marekani nchini Jordan yameibua hofu kubwa ya kuongezeka kwa mzozo wa kijeshi katika Mashariki ya Kati.

Kwa mujibu wa vyombo vya habari vya Marekani vinavyomnukuu maafisa wa serikali ya Washington, tukio hilo lilitokea wiki hii na kusababisha majeruhi miongoni mwa wanajeshi wa Marekani walioko katika vituo vya kijeshi nchini Jordan.

Hata hivyo, idadi kamili ya waliojeruhiwa haijabainishwa mara moja na maafisa wa Marekani hawakutoa maelezo ya kina kuhusu kiwango cha uharibifu uliosababishwa katika kambi hizo.

Mashambulizi haya yanatajwa kuwa sehemu ya operesheni za kulipiza kisasi za Iran kufuatia mashambulizi ya Marekani yaliyolenga maeneo mbalimbali nchini Iran. 

Tehran imeeleza kuwa hatua zake zinalenga kudhoofisha uwepo wa kijeshi wa Marekani katika eneo hilo, ikisisitiza kuwa vituo vya kijeshi vinavyotumiwa na Washington ni malengo halali ya mashambulizi yake.

Hali hii inadhihirisha kuendelea kwa mvutano wa muda mrefu kati ya Marekani na Iran, ambao mara kwa mara umekuwa ukijitokeza katika mashambulizi ya pande zote mbili katika mataifa ya Mashariki ya Kati.

Jordan, ambayo ni mshirika wa kijeshi wa Marekani, haijatoa maelezo ya kina kuhusu tukio hilo. Hata hivyo, nafasi yake ya kijiografia na ushirikiano wake wa kijeshi na Washington unaifanya kuwa sehemu muhimu katika operesheni za Marekani katika eneo hilo.